Բաժին : Առողջապահություն
21-րդ դարում բուժքույրն առավել մեծ առաքելություն ունի. Լևոն Ալթունյանը շնորհավորել է բուժքույրերին՝ միջազգային օրվա հետ կապված
ՀՀ առողջապահության նախարարի պաշտոնակատար Լևոն Ալթունյանը ուղերձ է հղել բուժքույրերի միջազգային օրվա կապակցությամբ:
Ուղերձում մասնավորապես ասվում է.
«Թանկագին բուժքույրեր, հարգելի գործընկերներ,
ջերմորեն շնորհավորում եմ ձեր մասնագիտական տոնի՝ բուժքույրերի միջազգային օրվա կապակցությամբ:
Չափազանց մեծ է ձեր դերակատարությունը։ Անհնար է պատկերացնել առողջապահության համակարգն առանց ձեր մասնակցության։ Դուք բժիշկների անփոխարինելի օգնականներն եք, որ մասնագիտական ձեր գործառույթներով, ձեր բարի վերաբերմունքով նպաստում եք հիվանդի արագ ապաքինմանը։
21-րդ դարում բուժքույրն առավել մեծ առաքելություն ունի, ինչը պահանջում է մշտապես բարձրացնել մասնագիտական ունակություններն ու փորձառությունը։ Հայաստանում ներդրված շարունակական մասնագիտական զարգացման համակարգը ձեզ համար հնարավորություն է ստեղծել ետ չմնալու աշխարհի զարգացումներից։
Հայաստանի և Արցախի բոլոր բուժքույրերին մաղթում եմ առողջություն և անձնական երջանկություն` մարդասիրական իրենց առաքելությունը մեծ նվիրումով և բարձր տրամադրությամբ շարունակելու համար»:
