Բաժին : Առողջապահություն
Առողջապահական տեսչական մարմինն աշխատում է դեղատոմսերի հետ կապված վարչապետի հանձնարարականի ուղղությամբ. նախարար
Առողջապահական տեսչական մարմինն աշխատում է ՀՀ վարչապետ Կարեն Կարապետյանի հանձնարարականի ուղղությամբ, որը վերաբերում է դեղատներում դեղատոմսեր տրամադրելու խնդրին: Այդ մասին կառավարության նիստից հետո լրագրողների հետ զրույցում նշեց ՀՀ առողջապահության նախարար Լևոն Ալթունյանը:
«Առողջապահական տեսչական մարմինն աշխատում է այդ ուղղությամբ, վարչապետին կզեկուցվի արդյունքների մասին, նույն արդյունքները կզեկուցվեն նաև ձեզ»,- ասաց Ալթունյանը:
Միաժամանակ, նախարարը չպատասխանեց հարցին՝ նորմա՞լ է, որ վարչապետն այդ մասին տեղյակ է, իսկ նախարարությունը՝ ոչ:
Կառավարության նախորդ նիստում վարչապետը հորդորել էր Առողջապահության նախարարությանը լինել ուշադիր գործընթացի ժամանակ, քանի որ անգամ տեղեկություններ կան, թե դեղատոմսերը դեղատների դիմաց գրում և լրացուցիչ գումարի դիմաց տրամադրում են. «Շատ ուշադիր եղեք, որպեսզի բուտաֆորիա չդառնա»,- ասել է Կարեն Կարապետյանը՝ դեղատոմսերի գրման և դեղեր բաց թողնելու կարգն աստիճանաբար ներդնելու որոշման քննարկման ժամանակ: