Բաժին : Լուրեր
Նյու Դելին արտակարգ դրություն է հայտարարել ժամ առ ժամ խտացող վտանգավոր մառախուղի պատճառով
Հնդկաստանի մայրաքաղաքն օդի աղտոտվածության առնչությամբ արտակարգ դրություն է հայտարարել և արգելել քաղաք բեռնատարների մուտքն ու շինարարական աշխատանքները՝ երրորդ օրն անընդմեջ քաղաքում տիրող վտանգավոր մառախուղի և ժամ առ ժամ վատթարացող օդի որակի պատճառով, հայտնում է Reuters-ը:
Ճգնաժամի պատճառը Նյու Դելին շրջապատող ֆերմերային տնտեսություններում հունձքն անօրինական կերպով այրելու գործողություններն են, սահմանափակ հանրային տրանսպորտ ունեցող քաղաքում ավտոմեքենաների արտանետումները և շինարարական փոշին:
ԱՄՆ դեսպանատունը հաշվարկել է, որ օդի մեջ պարունակվող մանր պինդ մասնիկների ինդեքսն (PM 2.5) առավոտյան ժամը 10-ի դրությամբ եղել է 608, մինչ դրա անվտանգ շեմը 50 է:
Քաղաքի բնակիչները բողոքել են գլխացավերից, հազից և աչքերի ցավից:
Քաղաքում շաբաթվա ընթացքում փակվել են դպրոցները: Չորեքշաբթի քաղաքային իշխանություններն արգելել են բեռնատարներին մտնել քաղաք, հրահանգել են դադարեցնել բոլոր տեսակի շինարարական աշխատանքները, իսկ ավտոկայանատեղիների վճարները քառապատիկ բարձրացվել են:
