Բաժին : Հասարակություն
Քաբուլում զինված մարդիկ հարձակում են գործել մասնավոր հեռուստաընկերության վրա
Աֆղանստանում զինված մարդկանց խումբը հարձակվել է մայրաքաղաք Քաբուլի հեռուստատեսային կայանի վրա: BBC-ի հաղորդմամբ՝ միջադեպի հետևանքով զոհեր և վիրավորներ կան:
Ականատեսները պատմում են, որ հարձակվողները նռնակներ են նետել և կրակ են բացել հրազենից Shamshad մասնավոր հեռուստաալիքի տարածքում:
Հեռուստաալիքի թղթակիցներից մեկը, որին հաջողվել է փախչել, հայտնել է, որ հարձակվողները դեռ գտնվում են շենքում, որտեղից կրակոցի ձայներ են հնչում:
«Իմ գործընկերներից ոմանք սպանվել և վիրավորվել են: Ինձ հաջողվել է փախչել», - ասել է Հաշմաթ Իստանկզաին:
Նախնական տեղեկությունների համաձայն՝ 2-5 մարդ է զոհվել: Ոստիկանության ներկայացուցչի խոսքով՝ հարձակումն սկսվել է հեռուստաալիքի շենքի մուտքի մոտ տեղի ունեցած պայթյունով, որից հետո հարձակվողները ներխուժել են շենք և կրակ բացել:
