«Շումախերական» ավտովթար՝ Կոտայքի մարզում. 28-ամյա վարորդը Mercedes-ով մի քանի ծառ արմատախիլ անելով, իսկ հետո 2.5 մետր «թռչելով»՝ «փաթաթվել» է ծառին, կա 4 վիրավոր

Երեկ՝ հոկտեմբերի 24-ին, խոշոր ավտովթար է տեղի ունեցել Կոտայքի մարզում։ Ժամը 23։20-ի սահմաններում Երևան քաղաքի Բ. երկրորդ թաղամասի բնակիչ՝ 28-ամյա Աշոտ Կոստանդյանը իր վարած Mercedes մակնիշի 35 FC 301 համարանիշի ավտոմեքենայով դեպի Սևան ընթանալիս դուրս է եկել ճանապարհի երթևեկելի գոտուց, բախվել մի քանի ծառերի, արմատախիլ արել դրանք, այնուհետև մոտ 2.5 մետր «թռիչք կատարելով»՝ կոտրել է հաստաբուն բարդին և կողաշրջված վիճակում բախվել մեկ այլ հաստաբուն բարդու։ Ինչպես  հայտնում է Shamshyan.com-ը՝  վթարի հետևանքով Ա. Կոստանդյանն ու նրա ուղևորներ՝ Երևան քաղաքի Կոմիտասի պողոտայի բնակիչ, 32-ամյա Պապին Բաբախանյանը, Կոտայքի մարզի Ալափարս գյուղի բնակիչներ, 29-ամյա Սահակ Գրիգորյանն ու 29-ամյա Գոռ Գալստյանը մարմնական վնասվածքներով տեղափոխվել են Չարենցավանի բժշկական կենտրոն, որտեղից էլ՝ Երևանի բժշկական կենտրոններ։ Ավտոմեքենան վերամբարձ քարշակի միջոցով տեղափոխվեց Ոստիկանության Չարենցավանի բաժնի պահպանվող հատուկ տարածք։