Բաժին : Հասարակություն
Ռուսաստանի և Իրաքի ԱԳՆ ղեկավարները Մոսկվայում կքննարկեն Քրդստանի հարցը
Ռուսաստանի դաշնության արտաքին գործերի նախարար Սերգեյ Լավրովն ու իր իրաքցի պաշտոնակից Իբրահիմ ալ Ջաֆարին վաղը Մոսկվայում հատուկ հանդիպում կանցկացնեն, որի ընթացքում կքննարկեն Իրաքյան Քրդստանի հարցը:
Ինչպես հայտնում է ТАСС գործակալությունը՝ հղում անելով ՌԴ ԱԳՆ-ի տարածած հայտարարությանը, ռուսական կողմը շեշտել է, որ կողմ է Իրաքի տարածքային ամբողջականության պահպանմանն ու խնդրի լուծումը տեսնում է կառուցողական երկխոսության մեջ:
Հիշեցնենք, որ օրեր առաջ Իրաքի ուժերը սկսել են երկրի հյուսիսում գտնվող թուրքմեններով, արաբներով և քրդերով բնակեցված Քիրքուք շրջանի վրա գրոհը, որն Իրաքյան Քրդստանի ու Իրաքի միջև վիճելի տարածքներից մեկն է համարվում: Կարճ ժամանակ անց իրաքյան բանակին հաջողվել է վերահսկողություն սահմանել Քիրքուքի օդանավակայանի և կարևոր նավթահանքերի օբյեկտների նկատմամբ:
Քիրքուքը պաշտոնապես Իրաքյան Քրդստանի մաս չի կազմել, սակայն տեղի քրդերը մասնակցել են անկախության հանրաքվեին:
Սեպտեմբերի 25-ին Իրաքյան Քրդստանում տեղի ունեցած անկախության հարցով հանրաքվեին մասնակցած քաղաքացիների 93.29 տոկոսն «այո» է ասել անկախացմանը: Հանրաքվեին մասնակցել է ընտրողների 72,16 տոկոսը:
