Բաժին : Հասարակություն
Էրդողանը խոստավանել է, որ իրենք «դավաճանել» են Ստամբուլը՝ փոխելով նրա պատմական դիմագիծը
Թուրքիայի նախագահ Ռեջեփ Թայիփ Էրդողանը խոստովանել է, որ քաղաքաշինական նոր ծրագրերի ժամանակ ինքն ու իր թիմը «դավաճանել» են Ստամբուլը՝ փոխելով նրա պատմական դիմագիծը, այս մասին գրում է թուրքական demokrathaber.org կայքը:
«Մենք այս քաղաքի գինը չիմացանք, մենք այս քաղաքը դավաճանեցինք և դեռ շարունակում ենք դավաճանել, դրա համար ես էլ եմ պատասխանատու», - ասել է Էրդողանը:
Ըստ Թուրքիայի նախագահի՝ հնագույն քաղաքների գեղեցկությունն ու յուրահատկությունը նրանում է, որ չկորցնելով իրենց մայր դիմագիծը՝ դրանք կարողանան հաջողությամբ իրենց մեջ ներկայացնել նաև նորն ու ժամանակակիցը, ինչն ըստ Էրդողանի նրանց չհաջողվեց:
«40 կամ 100 հարկանի շենքեր կառուցելը մեզ ժամանակակից ու քաղաքակիրթ չի դարձնի: Բայց խոստովանեմ՝ մենք էլ այդ խայծը կուլ տվեցինք», - անկեղծացել է Էրդողանը:
Նշենք, որ Թուրքիայի նախագահ ու նախկին վարչապետ Էրդողանը ժամանակին հանդիսացել է Ստամբուլի քաղաքապետը: Թուրքիայի ամենամեծ մեգապոլիսի ղեկավարի պաշտոնում ընտրվելը համարվում է Էրդողանի քաղաքական վերելքի սկիզբը:
