Բաժին : Հասարակություն
Քիրքուքի վրա հարձակվելու հրամանը իրանցիներն են տվել. քուրդ հրամանատար
Քրդական «փեշմերգա» ուժերի հրամանատարներից Ջաֆեր Շեյխ Մուսթաֆան քրդական Rudaw գործակալության հետ զրույցում հայտարարել է, որ Քիրքուքի քրդական դիրքերի վրա հարձակումը նախաձեռնողը իրանական ուժերն էին:
«Այսօրվա հարձակման հրամանը իրանցիներն են տվել», - ասել է Մուսթաֆան՝ ընդունելով քրդական ուժերի պարտությունը Քիրքուքում ու բացատրելով, թե ինչու է «փեշմերգա»-ն նախընտրել նահանջել:
«Եթե «փեշմերգա»-ն մնար իր դիրքերում ՝ մեծ կորուստներ կտայինք: Ես այս պարտությունից պատասխանատու եմ այնքան, որքան որ նախկինում եղած հաղթանակներից: Եթե սխալ բան եմ արել՝ ասեք», - ասել է քուրդ հրամանատարը:
Հիշեցնենք, որ նախօրեին Իրաքի ուժերը սկսել են երկրի հյուսիսում գտնվող թուրքմեններով, արաբներով և քրդերով բնակեցված Քիրքուք շրջանի վրա գրոհը, որն Իրաքյան Քրդստանի ու Իրաքի միջև վիճելի տարածքներից մեկն է համարվում: Կարճ ժամանակ անց իրաքյան բանակին հաջողվել է վերահսկողություն սահմանել Քիրքուքի օդանավակայանի և կարևոր նավթահանքերի օբյեկտների նկատմամբ:
Քիրքուքը պաշտոնապես Իրաքյան Քրդստանի մաս չի կազմել, սակայն տեղի քրդերը մասնակցել են անկախության հանրաքվեին:
Օրեր առաջ Իրաքի իշխանությունները մեղադրել են Իրաքյան Քրդստանի ղեկավարությանը դեպի Քիրքուք ոչ պետական ուժեր և մասնավորապես՝ Թուրքիայում ահաբեկչական հայտարարված «Քրդստանի աշխատավորական կուսակցություն» խմբավորման զինյալներ տեղափոխելու համար: Իրաքի անվտանգության հարցով նախարարական խորհուրդը նշել է, որ դրանով իսկ Իրաքյան Քրդստանը պատերազմ է հայտարարում մյուս իրաքցիներին և մնացյալ ուժերին:
