Հայտնի են Ավստրիայի խորհրդարանական ընտրությունների առաջին արդյունքները. երկիրը կարող է ունենալ ամենաերիտասարդ կանցլերը

Ավստրիայի արտահերթ խորհրդարանական ընտրությունների արդյունքներով, որոնք անցկացվել են հոկտեմբերի 15-ին, առաջատարը պահպանողական «Ավստրիայի ժողովրդական կուսակցությունն» է՝ ներկայիս արտաքին գործերի նախարար Սեբաստիան Կուրցի գլխավորությամբ: DW.com-ի հաղորդմամբ՝ ընտրությունների նախնական ոչ պաշտոնական արդյունքների համաձայն՝ պահպանողականները հավաքել են ձայների 31.5 տոկոսը: Երևանյան ժամանակով 20:00-ի դրությամբ՝ երկրորդ տեղով անցնում է 27.1 տոկոս ձայն ստացած Ավստրիայի Սոցիալ-դեմոկրատական կուսակցությունը, որը ղեկավարում է գործող կանցլեր Քրիստիան Կերնը: Առաջատար եռյակը եզրափակում է Ազատության ավստրիական կուսակցությունը՝ ձայների 25.9 տոկոսով: Ինչպես նշվում է, ընտրութունների արդյունքում երկիրը կունենա աշխարհի ամենաերիտասարդ ղեկավարը, եթե նոր կանցլեր դառնա 31-ամյա Սեբաստիան Կուրցը: