«Խաղի կանոնները պիտի վերանայվեն, հակառակ դեպքում կունենանք հավերժական իշխանություն»

Քաղաքական վերլուծաբան Ստյոպա Սաֆարյանը կարծում է, որ ընդդիմության խնդիրը զուտ հռետորաբանությունը չպիտի լինի. «Ընդդիմությունը շատ ավելի այլ մոտեցում պիտի ունենա, քան զուտ հռետորությամբ հանդես գալը: դա ընտրողներին այլևս հետաքրքիր չէ: Շատ դեպքերում, երբ մարդիկ նույնիսկ առանց ընտրակաշառքի ընտրում են Հանրապետականին, դա նշանակում է, որ նրանք ուզում են տեսնել մի ռեալ ուժ, որն իշխանություն ունի, քան գեղեցիկ խոսք, որն իշխանություն չունի»,-Norlur.am-ի հետ զրույցում ասաց նա: Ըստ Սաֆարյանի, այն քաղաքական ուժերը, որ ներկայացված չեն խորհրդարանում, և ոչ էլ ՏԻՄ-ներում, պիտի ամենօրյա աշխատանք տանեն և ռեալ արդյունքներ արձանագրեն, որպեսզի ամրագրեն իրենց դիրքերը: «Պետք է փորձել վերանայել խաղի կանոնները, եթե խաղի կանոնները չվերականգնվեն, իրենք էլ փոխարինվելու են նոր քաղաքական ուժերով: Եվ ստացվելու է, որ տարիների ընթացքում մենք ունենալու ենք տարբեր խմբեր, որ որպես ընդդիմություն են ներկայանում, ու նրանց մեկը մյուսով է փոխարինվում, իսկ ունենք իշխանություն, որը հավերժ է: Այո, ճիշտ եք, առաջիկա տարիներին ընտրություններ չկան, ու այն, ինչ չեն արել, պիտի հիմա անեն: Խաղի կանոնների փոփոխության խնդիր պիտի դնեն»: Ստեփան Սաֆարյանը վստահ է, որ եթե ընդդիմությունը չփոխի խաղի կանոններն, ուրեմն միշտ էլ փոքրամասնություն է մնալու:
Մեկնաբանություններ