Բաժին : Քաղաքականություն
«Սա նույնիսկ անեկդոտ կարելի է համարել, սա տավտալոգիայի գագաթնակետն էր»
«Ես, անկեղծ ասած, 99 տոկոսի նման շատ զարմացած եմ այս կոալիցիայից, որովհետև մի քաղաքական ուժ, որ մեծամասնություն ունի խորհրդարանում, գերադասեր համագործակցել որևէ մեկի հետ, հատկապես մի քաղաքական ուժի հետ, որն ունի 7 պատգամավոր ընդամենը»,-Norlur.am-ի հետ զրույցում ասաց քաղաքագետ Գագիկ Համբարյանը` խոսելով ՀՀԿ-ի ու ՀՅԴ-ի միջև ստորագրված կոալիցիոն հուշագրից:
«Ինձ համար շատ զարմանալի էր նաև պարոն Աշոտյանի կողմից բերված պատճառները, թե ինչի համար է այս կոալիցան կազմվում, որ կան օրենքներ, որոնց համար ՀՀԿ-ին ավելի շատ ձայն է պետք, քան ինքն ունի: Սա էլ, իմ կարծիքով, պատճառաբանություն չէ: Ամենաաբսուրդն այն է, որ համագորկցում են աջակողմյան հայացքներ ունեցող ՀՀԿ-ն ու սոցիալիստական ուղղություն ունեցող ՀՅԴ-ը: Այնտեղ գրված էր, որ ծրագրային դրույթներ են վերցված ՀՅԴ-ից, որ կյանքի պիտի կոչվեն, ինձ համար շատ հետաքրքիր են, թե որոնք են դրանք, քանի որ այսքան տարի ես չեմ տեսել, որ ՀՀԿ-ն որևէ կետ ՀՅԴ-ի ծրագրից կյանքի կոչի:
Ինձ համար նաև շատ զարմանալի է, թե ինչ է նշանակում պատասխանատվություն կրելը: Այսինքն, 56 պատգամավոր ունեցող ու 7 պատգամավոր ունեցող քաղաքական ուժերի միջև հավասարության նշան է դրվում»:
Ամենազավեշտալի կետն, ըստ Գագիկ Համբարյանի, այն է, որ ՀՅԴ-ն իրավունք չունի վարչապետի պաշտոնի նկատմամբ հավակնություն ունենալ: «Սա նույնիսկ անեկդոտ կարելի է համարել, սա տավտալոգիայի գագաթնակետն էր: ՀՅԴ-ը տարրական կցորդ է այս կոալիցիայի մեջ, ի՞նչ է ՀՅԴ-ն պիտի նման հավակնություններ ունենար: Այս քաղաքական ուժերի միջև նույնիսկ մոտ հավասարություն չկա: Թվային դիսբալանսն արդեն ցույց է տալիս, թե ՀՅԴ-ն ինչ ուժ ունի այս կոալիցիայում: Գեղեցիկ մտքերը, որ գրված են այդ հուշագրում, խելացի մարդկանց մոտ, հակառակը, շատ տխուր մտքեր են առաջացնում: Չի կարելի այդպիսի ծիծաղելի բաներ անել, հետո էլ դժգոհել, թե ժողովուրդը նորմալ չընդունեց»:
Քաղաքագետի համար զարմանալի է, որայս հուշագիրը կնքված է մինչև 2022 թվականը, քանի որ ոչ ոք չի կարող ասել, թե ինչ կլինի 2018 թվականի ապրիլից հետո, երբ ավարատվի նախագահ Սարգսյանի պաշտոնավարման ժամկետը: «Իհարկե, Սերժ Սարգսյանը կփորձի իր լծակներով իշխանությունը պահել, բայց ոչ մի նոր իշխանություն չի ցանկանում, որ նախկին իշխանավորները մոխրագույն կարդինալի դեր փորձեն ստանձնեն: Այդ համաձայնագիրը մինչև այդ է լինելու, իսկ թե ինչ կլինի հետո, դա արդեն հարց է»,-եզրափակեց նա:
