ՌԴ-ն պատրաստ է վերականգնել դիվանագիտական հարաբերությունները Վրաստանի հետ. Գալուզին
Ռուսաստանի Դաշնության արտաքին գործերի փոխնախարար Միխայիլ Գալուզինը հայտարարել է, որ Մոսկվան տրամադրված է Վրաստանի հետ դիվանագիտական հարաբերությունները վերականգնելուն։ Նրա խոսքով՝ Ռուսաստանի Դաշնությունը ցավում է, որ Թբիլիսին «երկխոսության վերականգնումը կապում է Աբխազիայի և Հարավային Օսիայի վերաբերյալ իր դիրքորոշման հետ»։
«2008 թվականի օգոստոսին ընդունված Աբխազիայի և Հարավային Օսիայի ինքնիշխանությունն ու անկախությունը ճանաչելու Ռուսաստանի Դաշնության որոշումը վերանայման ենթակա չէ, սակայն մենք պատրաստ ենք շարունակել համակողմանիորեն զարգացնել փոխշահավետ համագործակցությունը Վրաստանի հետ», – ասել է Գալուզինը «Իզվեստիա» թերթին տված հարցազրույցում։
Ապրիլի 11-ին Վրաստանի վարչապետ Իրակլի Կոբախիձեն հիշեցրել է, որ Թբիլիսին Մոսկվայի հետ հարաբերությունները պահպանում է «խաղաղ և պրագմատիկ» տոնով։
Երկրների միջև դիվանագիտական հարաբերությունները դադարեցվել են Վրաստանի կողմից այն բանից հետո, երբ 2008 թվականի օգոստոսին Ռուսաստանը ճանաչել է Աբխազիայի և Հարավային Օսիայի ինքնիշխանությունը: Թբիլիսին այդ տարածքները համարում է օկուպացված:
