Ինչպես է սև պղպեղն ազդում սրտի վրա. սննդաբաններն անվանել են այս համեմունքի 4 զարմանալի հատկությունները
Ավստրալիայի Վիկտորիա համալսարանի գիտնականներն ապացուցել են տաուրինի և սև պղպեղի էքստրակտի համադրության արդյունավետությունը սրտանոթային հիվանդությունների ռիսկի գործոնների նվազեցման գործում: Հետազոտությունը հրապարակվել է Nutrients ամսագրում:
Արևմտյան սննդակարգի ժողովրդականությունը, որը ներառում է մեծ քանակությամբ հագեցած ճարպեր, շաքար և աղ, ինչպես նաև նստակյաց կենսակերպը, մեծացրել են սիրտ-անոթային հիվանդությունների տարածվածությունը աշխարհի բնակչության շրջանում: Դարեր շարունակ բնական արտադրանքն օգտագործվել է այս և շատ այլ հիվանդությունների բուժման համար: Մասնավորապես, տաուրինը և սև պղպեղը վերջերս մեծ ուշադրության են արժանացել՝ շնորհիվ հակաբորբոքային, հակահիպերտոնիկ, հակաօքսիդանտ և հակաաթերոսկլերոտիկ հատկությունների վրա հիմնված նրանց սրտապաշտպան ազդեցության:
Տաուրինը սուլֆոնիկ թթու է (ծծումբ պարունակող ամինաթթու), որը ձևավորվում է մարմնում ցիստեինից և մեթիոնինից: Այնուամենայնիվ, տաուրինի մեծ մասը ստացվում է ծովամթերք, ձու, միս և թռչնամիս ուտելուց: Տաուրինը հակաբորբոքային ազդեցություն ունի։ Բացի այդ, այն կարող է նաև կարգավորել արյան ճնշումը և անոթային տոնուսը:
Սև պղպեղը լայնորեն օգտագործվում է բազմաթիվ հիվանդություններ բուժելու համար՝ շնորհիվ իր բարձր տերպենի պարունակության: Այս կենսաակտիվ միացությունները ներկայացնում են օրգանական միացությունների բազմազան դաս, որոնք սովորաբար հայտնաբերվում են բույսերի վրա հիմնված եթերայուղերում: Այն ունի հակաօքսիդանտ, հակաբորբոքային, հակահիպերլիպիդեմիկ և արյան ճնշումը իջեցնող հատկություն։
Իրենց աշխատանքում հեղինակները վերլուծել են առկա գրականությունը, որը գնահատել է այս համակցության հատկություններն ու արդյունավետությունը:
Մի քանի ուսումնասիրություններ ցույց են տվել, որ սուր և քրոնիկ բորբոքումները կարևոր դեր են խաղում սրտանոթային հիվանդությունների առաջընթացի և ծանրության մեջ: Տաուրինի և սև պղպեղի մեջ առկա բիոակտիվ միացությունները զգալիորեն թուլացնում են պրոբորբոքային միջնորդների արտահայտվածությունը՝ նվազեցնելով բորբոքման միջոցով առաջացած վնասի ծանրությունը:
Սև պղպեղի օգտագործմամբ՝
1. Խոլեստերինի մակարդակը կարող է բարելավվել
Գիտնականներն ուսումնասիրել են, թե ինչպես է սև պղպեղի ակտիվ բաղադրիչը՝ պիպերինը, ազդում սրտի առողջության վրա, պատմել է գրանցված դիետոլոգ Մեյսի Դիուլուսը։
Հետազոտությունները ցույց են տալիս, որ պիպերինը բարձրացնում է «լավ» խոլեստերինը (HDL) և նվազեցնում «վատ» խոլեստերինը (LDL), ինչպես նաև օգնում է պայքարել աթերոսկլերոզի հետ կապված գործընթացների դեմ: Բացի այդ, պիպերինը կարող է բարելավել արյան հոսքը:
2. Բորբոքումը կարող է թուլանալ
Պիպերինը հզոր հակաբորբոքային հատկություններ ունի և կարող է օգնել ուժեղացնել այլ մթերքների հակաբորբոքային ազդեցությունը:
3. Պահպանում է արյան շաքարի առողջ մակարդակը
Կենդանիների վրա կատարված ուսումնասիրությունները ցույց են տվել, որ պիպերինը կարող է նպաստել արյան շաքարի առողջ մակարդակին՝ բարելավելով ինսուլինի հանդեպ զգայունությունը և գլյուկոզայի նյութափոխանակությունը:
4. Կարող է բարելավել մարսողությունը
Սև պղպեղը կարող է աջակցել մեր մարսողությանը՝ խթանելով աղաթթվի արտադրությունը ստամոքսում և նվազեցնելով այնպիսի խնդիրներ, ինչպիսիք են փքվածությունն ու գազը:
