Երբ որ Լիբանանում լինենք, որդուս պսակադրությունը տեղի կունենա․ Վիգեն Էուլջեքջյանի կին
Երբ որ Լիբանանում լինենք, որդուս պսակադրությունը տեղի կունենա: Օդանվակայանում լրագրողներին ասել է Բաքվի գերությունից Հայաստան վերադարձած լիբանանահայ Վիգեն Էուլջեքջյանը կինը՝ Լինդան։
«Ես այնքան երջանիկ եմ, ուզում եմ ամուսնուս տեսնեմ։ Երեխաներս չափազանց ուրախ են, չեն հավատում, որ սա իրականություն է։ Երբ որ Լիբանանում լինենք, որդուս պսակադրությունը տեղի կունենա»։
Լինդան օդանավակայանից գնացել է «Մուրացան» զինվորական հոսպիտալ, որտեղ գտնվում է ամուսինը։
Հիշեցնենք, որ նախօրեին Ադրբեջանը Հայաստանին է հանձնել 4 գերի՝ Գևորգ Սուջյան, Դավիթ Դավթյան, Վիգեն Էուլջեքջյան և Վագիֆ Խաչատրյան։
Լիբանանահայ Վիգեն Էուլջեքջյանը գերեվարվել է 2020թ. նոյեմբերի 9-ին Շուշիի մոտակայքում, լիբանանցի Մարալ Նաջարյանի հետ: Նրանք գնացել էին Արցախ, որպեսզի Շուշիի հյուրանոցից մեկից վերցնեին Նաջարյանի իրերը։ Մարալ Նաջարյանն ազատ էր արձակվել 2021 թվականի մարտին։
Վիգեն Էուլջեքչյանին Բաքվի դատարանը 2021 թվականի հունիսի 14-ին դատապարտել է 20 տարվա ազատազրկման:
