Բամիան կամրացնի սիրտը, կպայքարի քաղցկեղի դեմ. այն ամեն օր ուտելու պատճառները

Բամիայի կիրառման ոլորտը բավականին լայն է, այն տնտեսապես կարևոր բանջարաբոստանային մթերք է, քանի որ օգտագործվում են բույսի բոլոր մասերը՝ թարմ տերևները, բողբոջները, ծաղիկները, ցողունը և սերմերը։ Դրանք կարելի է ավելացնել աղցանների, տաքուտեստների մեջ, օգտագործել թարմ, չորացրած, տապակած կամ խաշած վիճակում։

Անկախ նրանից, թե ինչպես եք այն օգտագործում, բամիան մանրաթելերի, B խմբի վիտամինների, մագնեզիումի, ֆոլաթթվի և այլ վիտամինների հարուստ աղբյուր է:

Բամիայի պատիճների ներսում գտնվող մածուցիկ նյութը կազմված է էկզոպոլիսաքարիդներից և գլիկոպրոտեիններից և ունի մի շարք օգտակար հատկություններ։ Այն հարուստ է սննդային մանրաթելերով, պարունակում է վիտամին B6-ի և ֆոլաթթվի օրական արժեքի մոտ 10%-ը։

Բամիան հակաօքսիդանտներով հարուստ մթերք է, ինչը նշանակում է, որ այն կարող է պայքարել ազատ ռադիկալների ազդեցության դեմ, բարելավել սրտանոթային աշխատանքը և պաշտպանել սրտի կորոնար հիվանդությունից, 2-րդ տիպի շաքարախտից, մարսողական համակարգի հիվանդություններից և, նույնիսկ, քաղցկեղի որոշ տեսակներից: Բացի այդ, այն պարունակում է այլ օգտակար վիտամիններ և հանքանյութեր, այդ թվում՝ թիամին, ռիբոֆլավին (վիտամին B2) և ցինկ։

Հետազոտությունները ցույց են տալիս, որ բամիայի սերմերը հատկապես հարուստ են պաշտպանիչ միացություններով, ինչպիսիք են`

պոլիֆենոլային միացությունները,

օլիգոմերային կատեխինները,

ֆլավոնոլի ածանցյալները,

ֆլավոնոլ գլիկոզիդները։

Բացի մի շարք օգտակար հատկություններից, այն պարունակում է սոլանին, որը հակացուցված է հոդերի հիվանդություններ ունեցող մարդկանց, քանի որ այն սրում է և հրահրում արթրիտի զարգացումը։ Բամիան հարուստ է ֆրուկտաններով (ածխաջրերի տեսակ), որը կարող է առաջացնել գազեր, ջղաձգումներ, փորլուծություն և փքվածություն։ Բամիայի բաղադրության մեջ պարունակվող օքսալատները կարող են խորացնել նաև երիկամային հիվանդությունները։