Ինչպես է համաշխարհային մամուլը արձագանքել Իրանին ԱՄՆ hարվածներին

Հունիսի 22-ին Միացյալ Նահանգները հարվածներ է հասցրել Իրանի երեք միջուկային օբյեկտների՝ Ֆորդոյում, Նաթանզում և Սպահանում: ԱՄՆ նախագահ Դոնալդ Թրամփը հայտարարել է, որ հարվածները լայնածավալ և թիրախային էին։ Իսրայելի վարչապետ Բենիամին Նեթանյահուն հավանություն է տվել Թրամփի որոշմանը: Իրանի արտաքին գործերի նախարար Աբբաս Արաղչին մեղադրել է Վաշինգտոնին միջազգային իրավունքը խախտելու համար։

Ինչպես են համաշխարհային լրատվամիջոցները արձագանքել ԱՄՆ-ի միջամտությանը Իսրայելի և Իրանի միջև հակամարտությանը՝ «Վեդոմոստի»-ի հոդվածում։

IRNA

Չնայած ԱՄՆ-ի կողմից մեր երկրի դեմ Իսրայելի ագրեսիայում իր դերը թաքցնելու 9 օր շարունակված ստի փորձերին, այս կառավարությունը վերջապես դուրս եկավ Իրանի ժողովրդի դեմ  և միացավ սիոնիստական ​​ռեժիմին՝ հարձակվելով միջուկային օբյեկտների վրա:

Bloomberg

Նախագահ Դոնալդ Թրամփը վաղուց է պաշտպանում Միացյալ Նահանգներին Մերձավոր Արևելքում պատերազմներից հեռու պահելու գաղափարը։ Միանալով Իսրայելի կողմից Իրանի դեմ ուղղված հարձակմանը՝ նա կտրուկ աշխարհաքաղաքական շրջադարձ է կատարում։ Ֆորդոյում, Նաթանզում և Սպահանում պայթյունները տեղի ունեցան ընդամենը մի քանի օր անց այն բանից հետո, երբ նա հայտարարեց, որ պատրաստ է երկու շաբաթ սպասել Իրանի միջուկային համաձայնագրի շուրջ բանակցություններին։ Նշաններ, որ Թրամփն ավելի բաց է դարձել ռազմական գործողությունների հնարավորության նկատմամբ, ի հայտ եկան անցյալ շաբաթ, երբ նա հանկարծակի լքեց Կանադայում կայացած G7 գագաթնաժողովը՝ Մերձավոր Արևելքում հակամարտությանը կենտրոնանալու համար։

New York Times

Թրամփի համար թշնամական երկրի միջուկային ենթակառուցվածքին հարձակվելու որոշումը նրա երկրորդ ժամկետի ամենամեծ և հնարավոր է՝ ամենավտանգավոր ռիսկն է։ Նա խաղադրույք է կատարում Իրանի իր միջուկային ծրագիրը երբևէ վերականգնելու հնարավորությունը զսպելու վրա։ Սա հավակնոտ նպատակ է. Իրանը հստակորեն հայտարարել է, որ հարձակման դեպքում դուրս կգա Միջուկային զենքի չտարածման մասին պայմանագրից։

Al Jazeera

Իրանի ամենամեծ հարստացման օբյեկտի՝ Ֆորդոյի վրա ԱՄՆ-ի հարվածների հետևանքները մնում են անորոշ։ Իրանցի օրենսդիրներից մեկը հայտարարել է, որ օբյեկտը կրել է միայն մակերեսային վնաս։ Եվ Իրանից և Պարսից ծոցից ստացված նախնական հաղորդագրությունները ցույց են տալիս, որ հարձակումներից հետո ռադիոակտիվ նյութի էական արտահոսք չի եղել, ինչը ենթադրում է, որ Իրանի իշխանությունները ԱՄՆ-ի կողմից թիրախավորված վայրերից հեռացրել են հարստացված ուրանի պաշարները։ Նույնիսկ եթե ԱՄՆ-ի կողմից ռմբակոծված երեք վայրերը լիովին ոչնչացվեին, Իրանը շարունակում է պահպանել հարստացման տեխնոլոգիաները, որոնք թույլ են տալիս վերականգնել իր միջուկային ծրագիրը։ Երկրում կարող են լինել նաև գաղտնի օբյեկտներ, որոնք շարունակում են գործել։ Սակայն, եթե հարվածները իսկապես «հիանալի ռազմական հաջողություն» լինեին, ինչպես պնդում էր Թրամփը, Իրանի միջուկային ծրագիրը կարող է հետ ընկած լինել ամիսներով, եթե ոչ տարիներով։

Reuters

ԱՄՆ-ի դրամատիկ հարվածը, այդ թվում՝ Իրանի ամենաուժեղ միջուկային օբյեկտի վրա, որը գտնվում է խորը գետնի տակ, նշանավորում է Թրամփի երկու ժամկետների ամենամեծ արտաքին քաղաքական ավանտյուրան՝ լի ռիսկերով և անորոշությամբ։ Նման գործողությունները կարող են հանգեցնել ավելի մեծ և ավելի երկարատև հակամարտության, քան Թրամփը պատկերացնում էր՝ հիշեցնելով «հավերժական պատերազմների» մասին, որոնք Ամերիկան ​​մղել էր Իրաքում և Աֆղանստանում, որոնք նա ծաղրել էր որպես «հիմարություն» և խոստացել երբեք չմիջամտել։

CNN

Եթե Թրամփի գործողությունները չոչնչացնեն Իրանի միջուկային ծրագիրը՝ չնայած նրա այն պնդմանը, որ ինքը «ոչնչացրել է» այն ամերիկյան ավիահարվածներով, դրանք կարող են Միացյալ Նահանգները և աշխարհը դնել աղետալի ուղու վրա։ Այժմ վտանգն այն է, որ իրանական ռեժիմը կպատասխանի՝ հարձակվելով տարածաշրջանում ամերիկյան ուժերի, թիրախների կամ քաղաքացիական անձանց վրա, և հակամարտությունը կվերածվի լայնածավալ պատերազմի։ Նա չի կարող իմանալ, թե ինչ հետևանքներ կունենան ԱՄՆ-ի կողմից Իսրայելի՝ Իրանի վրա հարձակման լիակատար աջակցությունը։ Նախագահը, որը իշխանության եկավ պատերազմները դադարեցնելու խոստումով, կարծես թե նորն է սկսել է։

The Washington Post

Հաջորդիվ կարող են խորը հետևանքներ լինել Թրամփի նախագահության համար։ Եթե ​​Իրանը բավականաչափ թուլացած լինի, որպեսզի չկարողանա նշանակալի հակահարված տալ, Թրամփը հարված կհասցնի վաղեմի հակառակորդին, որը ազդանշան կուղարկի Չինաստանին, Ռուսաստանին և այլ գլոբալ մրցակիցներին, որ նա չի տատանվի անհրաժեշտության դեպքում ռազմական ուժ կիրառել։ Սակայն եթե Իրանը չհամաձայնի խաղաղության Թրամփի պայմաններով, կբացվի դուռ շատ ավելի խորը և հնարավոր է՝ ավելի երկար հակամարտության համա»։

The Wall Street Journal

Չնայած ԱՄՆ հարվածները թվացին սահմանափակ, Ամերիկայի միջամտությունը սպառնում է ընդլայնել հակամարտությունը, որը տեղի է ունենում աշխարհի ամենակարևոր էներգետիկ գոտնիներից մեկի սրտում: Իրանը հայտարարել է, որ կհարվածի ԱՄՆ ուժերին ամբողջ տարածաշրջանում, եթե  ԱՄՆ-ն միջամտի հակամարտությանը, և նավթով և գազով հարուստ Պարսից ծոցի երկրները, որտեղ գտնվում են ԱՄՆ ռազմաբազաները, մտահոգված են, որ բռնությունը կարող է տարածվել իրենց տարածքներում։