Բաժին : Քաղաքականություն
Զինվորի հացը գողանալու երևույթը խայտառակություն է, բայց անմեղության կանխավարկածը չպետք է խախտել. Է. Շարմազանով
Եթե պարզվի, որ ԱԱԾ-ի հրապարակածը իրականություն է, սրան արդարացում չկա: Այս մասին լրագրողների հետ զրույցում ասաց ԱԺ փոխխոսնակ Էդուարդ Շարմազանովը` անդրադառնալով ԱԱԾ-ի բացահայտումներին` գեներալ, ԵԿՄ նախագահ, ԱԺ պատգամավոր Մանվել Գրիգորյանի հետ կապված:
«Մեր կուսակցությունը հստակ նշում է` ցանկացած օրինախախտում մեզ համար դատապարտելի է, օրենքի առաջ երկակի ստանդարտներ չպետք է լինեն: Ես նախ և առաջ կրում եմ պատասխանատվություն իմ կուսակցության, բայց և մասնավորապես իմ արարքների համար, իմ ճակատը բաց է, բաց ճակատով ասում եմ՝ նրանք, ովքեր բյուջեից մի կոպեկ գողացել են, թող պատժվեն»,-շեշտեց Էդուարդ Շարմազանովը:
Էդուարդ Շարմազանովն ասաց, որ պետք է սպասել ԱԱԾ բացահայտումներին, թե արարքը կոնկրետ ում կողմից է արվել:
«Արարքը կատարվել է, արդեն դատապարտել է, խայտառակություն է, ում կողմից է կատարվել՝ թող ԱԱԾ-ն պարզի: Երևույթն անթույլատրելի է, ի՞նչ գործ ուներ տուշոնկեն, զինվորի հացը, մնացածը այնտեղ»,-ասաց նա:
Էդուարդ Շարմազանովը հորդորեց անմեղության կանխավարկածը չխախտել:
Անդրադառնալով հարցին զինվորի հաց գողացողը ազգի հերո՞ս է, թե՞ ազգի տականք, Էդուարդ Շարմազանովն ասաց, որ ազգի տականք, բայց քանի դեռ չկա դատարանի վճիռ չեն կարող ասել, թե ով է մեղավոր:
Անդրադառնալով հարցին՝ Մանվել Գրիգորյանին խմբակցությունից կհեռացնե՞ն, թե ոչ՝ Էդուարդ Շարմազանովը կրկին ասաց, որ պետք է տեսնել՝ դատական գործընթացն ինչպես է ընթանում: