Բաժին : Քաղաքականություն
Հուսանք՝ հաջորդ բյուջեի աճը պայմանավորված կլինի ոչ թե ՌԴ տնտեսության աճի, այլ ՀՀ-ում հրաշալի միջավայրի ստեղծած ներդրումների շնորհիվ. Արամ Սարգսյան
Հայաստանի Հանրապետության 2017 թվականի պետական բյուջեի կատարման տարեկան հաշվետվության քննարկմանը «Ելք» խմբակցության պատգամավոր Արամ Սարգսյանը նշեց, թե անհարմար վիճակ է ստեղծվել, քանի որ բյուջեի կատարողականը ներկայացնում է նոր կառավարությունը, որը գրեթե կապ չունի այս բյուջեի կատարման հետ:
Սարգսյանն ասաց, թե այս պատճառով իր խոսքը և ցանկությունն ուղղում է ապագայի կառավարությանը՝ հույս ունենալով, որ կլինի հենց այս գործող կառավարությունը:
Արամ Սարգսյանը նշեց, որ «Ելք» խմբակցության պատգամավոր Գևորգ Գորգիսյանը հարցրեց, որ բյուջեի 7,5% աճի դրդապատճառը որն է եղել և պատասխանեցին, որ հիմնականում պայմանավորված է ՌԴ-ի տնտեսության աճով՝ որպես մեր բարեկամ երկիր և նաև պղնձի գների շեշտակի աճով:
«Ուզում եմ, որ հաջորդ անգամ, երբ բյուջեի աճը ներկայացնեք, գոնե 3%, ոչ թե պղնձի գների աճի հիման վրա լինի, պղնձի կոնցենտրատի վաճառքի աճի հիման վրա լինի, այլ որ ասեք՝ ներդրումների համար հրաշալի միջավայր ենք ստեղծել, և այսքան միլիարդի ներդրում է եղել՝ ժողովրդավարական ալիքի, ազատ տնտեսական դաշտի հիման վրա, աճը լինի ջրային ռեսուրսների կառավարման և այդ ռեսուրների վաճառքի հիման վրա»,-ասաց նա:
Արամ Սարգսյանը, դիմելով ԱԺ-ում ներկա նոր կառավարության անդամներին, նշեց, թե ցանկանում է, որ նրանց բյուջեն ու կատարողականը ունենան ծրագրային նորարական ուղղություններ, որոնք երկրում աշխատատեղեր կբացեն, նոր մուտքեր կապահովեն բյուջե:
«Ցանկանում եմ, որ այդ մուտքերը կախված լինեն ՀՀ-ից և ՀՀ քաղաքացուց, իհարկե նաև միջազգային ազդեցությունն էլ, տա Աստված, որ բարենպաստ լինի»,-ասաց նա:
