Բաժին : Հայաստան/Արցախ
ՔԿՀ-ում Հրաչյա Բոյաջյանը շարունակում է հացադուլը
Սարի թաղի դեպքերի ժամանակ կալանավորվածներից Հրաչյա Բոյաջյանը հացադուլ է հայտարարել: Այս մասին Norlur.am-ին հայտնեց նրա կինը: Արդեն մոտ երկու շաբաթ է, որ նա հացադուլի մեջ է գտնվում: Կալանավորի պահանջն է փոխել խափանման միջոցը:
Ըստ մեղադրական եզրակացության՝ Հրաչյա Բոյաջյանը 2016թ. հուլիսի 19-ին Խորենացի փողոցին հարող Գլինկայի և Որմնադիրների փողոցների հատման վայրում մի խումբ անձանց հետ, առողջության համար վտանգավոր բռնություն է գործադրել իրենց ծառայողական պարտականությունները կատարող ՀՀ ոստիկանության մի շարք ծառայողների նկատմամբ:
Հրաչյա Բոյաջյանի փաստաբան Արայիկ Զալյանի ներկայացմամբ, ՊՊԾ գնդի գրավմամբ պայմանավորված՝ երեք օր փակվել են Սարի Թաղ տանող ճանապարհները, անջատել են էլեկտրաէներգիան, գազամատակարարումը, թաղամասը սպասարկող տրանսպորտային միջոցները սկսել են չգործել: Մարդը հանդիպել է ոստիկանին, ներկայացրել իր դժգոհությունը, որից հետո, ինչպես տեսանյութում է երևում, ոստիկանները հանել են իրենց զենքերը և այդ կերպ որոշակի գործողություններ հրահրել:
Նա առաջադրված մեղադրանքն անհիմն է համարում, քանի որ ապացույցներ չկան, բացի այդ՝ հաշվի չի առնվել Հրաչյա Բոյաջյանի արարքի պատճառահետևանքային կապը և բողոքը:
ՄԻ քանի օր առաջ նա տեղափոխվել է «Նուբարաշեն» քրեակատարողական հիմնակի բուժմաս, սակայն շարունակում է հացադուլը: