Փոքր փոշեկուլ մեքենաներն առանց ջրի օգտագործելը նպատակահարմար չէ, ավելի շատ փոշի են հանում, քան՝ կլանում. Տիգրան Ավինյան
Այս հին փոշեկուլ մեքենաներն այս եղանակային պայմաններին այդքան էլ էֆեկտիվ չեն, քանի որ ջուր չենք կարողանում թողնել, փոշին բարձրանում է: Այս մասին Երևանի քաղաքապետարանի գործակարգավարական նիստին ասաց քաղաքապետ Տիգրան Ավինյանը:
«Այն օրը Մաշտոցի պողոտայով որ իջնում էի, տեսնում էի՝ ավելի շատ փոշի է բարձրացնում այդ մեքենան, քան կլանում»,- ասաց քաղաքապետը:
«Երևանի աղբահանություն և սանիտարական մաքրում» հիմնարկի տնօրեն Սաշա Կատվալյանն էլ պարզաբանեց՝ քանի որ ջերմաստիճանը զրոյից ցածր է, ջրի սիստեմը մենք չենք կարողանում օգտագործել, մեքենան կունենա տեխնիկական խնդիրներ:
«Ցածր ջերմաստիճանի պայմանով բոլորս էլ գիտենք, որ ջուրը սառում է ու այդ սիստեմներն ամբողջությամբ կխափանվեն, դրա համար այս պահին ջրի սիստեմն անջատվում է: Աշխատանքները փոշեկուլների հիմնականում տեղի են ունենում գիշերը, 2 հատ փոքր փոշեկուլ ենք կարողանում օգտագործել ցերեկը, մնացած մեծ չափերի փոշեկուլները 12-ից հետո են աշխատանքի դուրս գալիս»,- ասաց Կատվալյանը:
«Համենայն դեպս, ինքս տեսել եմ, ու այդ փոքր ցերեկային փոշեկուլների աշխատանքի էֆեկտիվության վերաբերյալ մոտս հարցեր են առաջացել: Մանավանդ ակտիվ ժամերին, երբ մեքենաների մեծ հոսք կա, այդ փոքր փոշեկուլ մեքենաներն առանց ջրի օգտագործելն ուղղակի նպատակահարմար չէ»,- ի պատասխան ասաց Ավինյանը:
Նոր փոշեկուլ մեքենաները, ըստ Կատվալյանի, կառաքվեն մինչև մարտի 17-20-ի հատվածում:
