ՀՀ-ում ԱՄՆ դեսպան Քրիստինա Քվինը հունվարի կեսին կավարտի իր աշխատանքը Հայաստանում
Երեք տարի պաշտոնավարումից հետո հունվարի կեսին Հայաստանում Միացյալ Նահանգների դեսպան Քրիստինա Քվինը կավարտի իր աշխատանքը ՀՀ-ում։
Այս մասին հայտնում են ՀՀ-ում ԱՄՆ դեսպանությունից՝ ընդգծելով, որ դեսպանի հեռանալուց հետո ԱՄՆ քաղաքականությունը Հայաստանում փոփոխության չի ենթարկվի։
«Միացյալ Նահանգները շարունակում է հավատարիմ մնալ Հայաստանի հետ իր գործընկերությանն ու ակնկալում է տեսնել ԱՄՆ-ի և Հայաստանի միջև ռազմավարական գործընկերության հետագա զարգացում, ինչպես նաև՝ օգոստոսի 8-ին Վաշինգտոնում կայացած խաղաղության պատմական գագաթնաժողովի ընթացքում նախագահ Թրամփի և վարչապետ Փաշինյանի միջև ստորագրված երկկողմ համաձայնագրերի իրականացում»,- նշված է դեսպանության տարածած հաղորդագրության մեջ։
Քրիստինա Քվինը ԱՄՆ բարձրագույն դիվանագիտական կորպուսի կադրային ծառայող է՝ նախարար-խորհրդականի դիվանագիտական աստիճանով: Դեսպան Քվինը Երևան է ժամանել 2023թ․փետրվարի 16-ին։ Նա Միացյալ Նահանգների 10-րդ դեսպանն էր Հայաստանում։
