ԿԳՄՍ-ն մոտ ապագայում կքննարկի ավագ դպրոցում վարորդական տեսական դասընթացներ մտցնելու հարցը. Անդրեասյան
Հայաստանում կքննարկեն ավագ դպրոցում՝ ավարտական դասարանների աշակերտների համար վարորդական տեսական դասընթացներ մտցնելու հարցը:
«Արմենպրես»-ի փոխանցմամբ՝ այս մասին ասաց Կրթության, գիտության, մշակույթի և սպորտի նախարար Ժաննա Անդրեասյանն ԱԺ-կառավարություն հարցուպատասխանին:
«Քաղաքացիական պայմանագիր» խմբակցության պատգամավոր Լիլիթ Ստեփանյանը փոխանցեց 12-րդ դասարանի աշակերտների առաջարկը՝ ավագ դպրոցում ունենալու ծրագիր, որտեղ կկարողանան վարորդական քննությունների համար տեսական գիտելիքներ ձեռք բերել:
«Հրաշալի առաջարկ է, ես կողմ եմ, որ 12-րդ դասարանում վարորդական դասընթացն առնվազն տեսական մասով դառնա հնարավորություն մեր աշակերտների համար, և իրենք կարողանան նաև հանձնել համապատասխան քննությունները: Վստահ եմ, որ կարող ենք առնվազն սկսել փորձարկել ավագ դպրոցներից: Վստահ եմ, որ մոտ ապագայում կքննարկենք, թե ինչպես կարող են սկսել իրականացնել, և ինչու ոչ, սեպտեմբերից մեկնարկել»,-ասաց Անդրեասյանը:
