Չինաստանի ԱԳՆ-ն հերքել է Ուկրաինա խաղաղապահներ ուղարկելու տեղեկությունը
Չինաստանի ԱԳՆ-ն հերքել է տեղեկությունը, թե երկրի ներկայացուցիչները քննարկում են չինացի խաղաղապահներ Ուկրաինա ուղարկելու հարցը։ Այս մասին, kommersant.ru-ի փոխանցմամբ, երկուշաբթի կայացած ճեպազրույցում հայտարարել է երկրի ԱԳՆ պաշտոնական ներկայացուցիչ Գո Ցզյակունը։
«Ցանկանում եմ ընդգծել, որ համապատասխան տեղեկատվությունը լիովին չի համապատասխանում իրականությանը», – ասել է Չինաստանի արտաքին գործերի նախարարության ներկայացուցիչը:
ԱԳՆ խոսնակը նաև ընդգծել է, որ Չինաստանը մտադիր է «շարունակել աշխատել միջազգային հանրության հետ՝ առաջ մղելու խաղաղ բանակցությունները և պայմաններ ստեղծելու հրադադարի և հակամարտությունը դադարեցնելու համար»:
Մարտի 22-ին գերմանական Welt հրատարակությունը, հղում անելով ԵՄ դիվանագետներին, հայտնել էր, որ Չինաստանի ներկայացուցիչները խնդրել են ԵՄ իշխանություններին քննարկել Չինաստանի մասնակցությունը խաղաղապահ առաքելությանը, որը հրադադարի շուրջ համաձայնության հասնելուց հետո կարող է ուղարկվել Ուկրաինա՝ վերահսկելու պայմանավորվածությունների կատարումը։
Փետրվարին Հոնկոնգի South China Morning Post-ը հայտնել էր, որ Չինաստանը պատրաստ է խաղաղապահ ուժեր ուղարկել Ուկրաինա, եթե անհրաժեշտ լինի զինադադարի հաստատումից հետո:
Վերջին շաբաթների ընթացքում Եվրոպայում ակտիվորեն քննարկվում է Ուկրաինա խաղաղապահներ ուղարկելու հարցը։ Մարտի սկզբին, Լոնդոնում եվրոպական պետությունների գագաթնաժողովից հետո, Մեծ Բրիտանիայի վարչապետ Քիր Սթարմերը հայտարարեց խաղաղապահ կոնտինգենտի ձևավորմանը մասնակցելու «ցանկացողների կոալիցիա» ստեղծելու մասին։ Մեծ Բրիտանիայի վարչապետի խոսքով՝ կոալիցիայի գագաթնաժողովը նախատեսված է մարտի 27-ին։
