Դրակուլան ձեր համեմատ խարիզմատիկ կերպար էր. Կոնջորյանը՝ ընդդիմությանը
Հարգելի՛ գործընկերներ, լավ նորությունն այն է, որ դուք չեք փոխվել, մնացել եք նույնը, և, ըստ էության, այն, ինչ որ այսօր կատարվեց այստեղ ձեր կատարմամբ, հերթական անգամ ապացուցում է այն, որ դուք մնացել եք դուք:
Այս մասին ԱԺ ամբիոնից դիմելով ընդդիմությանը՝ ասաց «Քաղաքացիական պայմանագիր» խմբակցության ղեկավար Հայկ Կոնջորյանը:
Այսինքն, ՀՀ քարտեզի հետ կռիվ եք տալիս արդեն ինչքան ժամանակ է, քարտեզը ցույց են տալիս, կռիվ եք տալիս: Ճիշտ ասաց գործընկերս էլի, ոնց որ խաչը դրակուլային ցույց տաս, դրակուլան սկսի բան անել էլի, չնայած դրակուլան ձեր համեմատ շատ խարիզմատիկ կերպար էր:
Բա որ դուք ասում եք, թե մենք, ուրացել ենք, հեչ մտքներովդ չի անցնո՞ւմ, բա 2021 թվականին ինչի ՀՀ ժողովուրդը մեզ ձայն տվեց, իսկ դուք հիմա նստած եք այդ տեղում: Կարո՞ղ է մի հատ հանկարծ մտածեիք, ասեիք՝ կարո՞ղ է ամեն դեպքում դուք եք ուրացողը, կարո՞ղ է այդ ուրացման ամբողջ կենդանի հուշարձանը դուք եք ու մարդիկ հենց իրենց գնահատականը ձեզ տվել են ընտրությունների ժամանակ, իրենց գնահատականը ձեզ տալիս են ամեն օր հարցումների տեսքով և այլն և այլն»,- ասաց նա:
Կոնջորյանը շարունակեց. «Ասում եք՝ Սևանը ինչի՞ է դատարկ, լավ ա չեք ասում սիգի ձվադրման սեզոնն է, ինչի՞ ձվադրման պրոցեսը չի ցույց տալիս, կամ ասենք զինանշանի արծիվն ինչի չի միշտ այսպես սլանում, այսպես գալիս ձեր կողքով, այսպես անցնում:
Դուք ձեր առողջ բանականությունը որտե՞ղ եք թողել, երբ որ եկել եք այսօր ԱԺ, հարգելի գործընկերներ, ի վերջո քննարկումը պիտի տրամաբանության վրա հիմնված լինի էլի ինչ եք խոսում»:
