Մեծ Բրիտանիայում կինը կեղծ փաստաթղթերով 20 տարի հոգեբույժ է աշխատել՝ վաստակելով ավելի քան 1,2 միլիոն ֆունտ ստեռլինգ
Մեծ Բրիտանիայում ազատազրկման է դատապարտվել կինը, որը կեղծ փաստաթղթեր էր օգտագործել՝ երկրի Առողջապահության ազգային համակարգում երկու տասնամյակ հոգեբուժությամբ զբաղվելու համար: Դատարանը նրան պարտավորեցրել է վերադարձնել հարյուր հազարավոր ֆունտ ստեռլինգ, հայտնում է Oddity Central-ը։
Իրանում ծնված Ժոլիա Ալեմին 1990-ականների սկզբին ընտանիքի հետ արտագաղթել է Օքլենդ, Նոր Զելանդիա։ Այնտեղ նա չի կարողացել ստանալ բժշկական գիտությունների բակալավրի և վիրաբուժության բակալավրի աստիճաններ, որոնք անհրաժեշտ էին որակավորված բժիշկ աշխատելու համար, սակայն դա չի խանգարել նրան երազանքը կյանքի կոչելու հարցում։
Որոշ ժամանակ անց նա տեղափոխվել է Մեծ Բրիտանիա, որտեղ օգտվել է օրենքում առկա բացից. այն թույլ էր տալիս Համագործակցության երկրների բժիշկներին առանց լրացուցիչ քննությունների աշխատել բժշկական ոլորտում։ Սովորաբար, արտերկրում դիպլոմ ստացած բժիշկները պետք է հանձնեն PLAB (Մասնագիտական և Լեզվաբանական Գնահատման Խորհուրդ) քննությունը, սակայն Ալեմին շրջանցել է այս պահանջը՝ օգտագործելով Մեծ Բրիտանիայում կեղծված փաստաթղթեր։ Այնուհետև նա մոտ 20 տարի զբաղվել է հոգեբուժությամբ Մեծ Բրիտանիայի տարբեր մասերում։
«Ալեմիին քիչ էր հետաքրքրում հիվանդների բարեկեցությունը։ Նա 20 տարի շարունակ կեղծ նորզելանդական բժշկական վկայականներով որպես հոգեբույժ է աշխատել Մեծ Բրիտանիայի Առողջապահության ազգային համակարգում: Այդ ընթացքում նա, ամենայն հավանականությամբ, հարյուրավոր հիվանդների է ընդունել՝ առանց համապատասխան որակավորման, ինչը կարող էր լուրջ վտանգ ներկայացնել այդ մարդկանց առողջության համար», – ասել է Թագավորական դատախազական ծառայության ներկայացուցիչ Ադրիան Ֆոսթերը։
Կեղծ բժշկի հաջողակ շրջանն ավարտվել է 2018 թվականին, երբ նա մեղավոր է ճանաչվել 84-ամյա կնոջ կտակը կեղծելու համար՝ վերջինիս 300,000 ֆունտ ստեռլինգ արժողությամբ տունը ժառանգելու նպատակով։ Այս դեպքը բացահայտել է կեղծիքների և խարդախության մի ամբողջ շղթա։ Ալեմին դատապարտվել է հինգ տարվա ազատազրկման՝ երեք տարբեր խարդախությունների համար։ Հետագա բացահայտումները հանգեցրել են նրա պատժի երկարաձգման։ Վերջերս դատարանը պարտադրել է նրան վերադարձնել ավելի քան 400,000 ֆունտ ստեռլինգ, այլապես նրան սպառնում է լրացուցիչ ազատազրկում։
Դատախազների պնդմամբ՝ Ալեմին ավելի քան 20 տարվա ընթացքում Մեծ Բրիտանիայի Ազգային առողջապահական ծառայությունում վաստակել է ավելի քան 1,2 միլիոն ֆունտ ստեռլինգ և վտանգի է ենթարկել իր անտեղյակ հիվանդների կյանքը։
Չի բացառվում, որ այն օրինական բացը, որը օգտագործել էր Ժոլիա Ալեմին՝ առանց որևէ քննության բժշկությամբ զբաղվելու համար, հնարավոր է՝ օգտագործվել է նաև այլ խարդախների կողմից։ Այս դեպքից հետո Մեծ Բրիտանիայի Բժշկական ընդհանուր խորհուրդը նախաձեռնել է մասշտաբային վերանայում՝ շուրջ 3,000 արտերկրյա բժիշկների վկայականների, որոնք տրվել էին 1990-ականներին։
